O se vaiaso tāua lenei i le kalena a le Puleaga faa-Aki Epikopō a Samoa Apia o le Ekalesia Katoliko i lo tatou atunuu, ona o loo tapena ma sauniuni ai i le sauniga o le faauuina o le faauluuluga o le puleaga, o le tofiga Aki Epikopō o le afioga Patele Mosese Vitolio Tui.
Ua faailoa lautele i auala o faasalalauga a le ekalesia lea polokalame e amata i le Aso Lulu o le vaiaso nei i le sauniga o le folafolaga ma le ta’utinoga a le Aki Epikopō filifilia, e faia i le malumalu Katoliko o Sagato Mikaele i Leauvaa i le 7 i le taeao.
O le aso lava lea o le a see ane ai sauniga uma i le nofoaga o le Tofamamao i Leauvaa o le a faatino ai le sauniga o le taliina o meaalofa ma le ‘ava faatupu e faia i le 4 i le afiafi.
O le Aso Tofi 22 o Aokuso o le sauniga o le Misasa o le faauuga e faia i le malae o Sagata Telesia i le Tofamamao, sosoo ai ma faaaloaloga ma le taumafataga.
O le Aso Faraile o le sauniga o le uluai Misasa Paia o le a faatino e le afioga i le Aki Epikopo filifilia le afioga Mosese Vitolui Tui, ma o le malae lava o Sagata Telesia i le Tofamamao o le a faia ai lea sauniga tāua a le ekalesia.
Ua iai le talitonuga e toatele le mamalu o le Puleaga a Samoa Apia, faapea o aiga ma uo e faasino i le Aki Epikopō filifilia o le a auai i ia sauniga, aemaise o sui o le Malo o Samoa ma malo valaaulia.
