samoa court

Faamaonia moliaga fasioti tagata pa’ivalea o alii e to’afā

I le mae’a o le vaiaso ma aso sa su’esu’eina ai i luma o se laulau o faatonu moliaga o ni alii se to’afā sa tuua’ia i le faaoo o le maliu i se isi taule’ale’a i se vevesi ia Fepuari o le tausaga e 2018 na aafia uma ai i latou ma lē ua maliu, ua faamaonia lo latou moliaga o le fasioti tagata pa’ivalea ae lē faamaonia le moliaga o le fasioti tagata faamoemoeina.

O i latou ua molia o Puka Wesley, Faasipa Matu’u, Milo Lilomaiava, ma Peato Upu ua nofo faatali nei mo se faasalaga a le faamasinoga o le a fofogaina i le Aso Gafua 11 o le masina fou o Iulai. Na faailoa e loia a leoleo i le amataga o su’esu’ega o le solitulafono, sa faia se taaloga volipolo i le lotoā a le Ekalesia a Iesu Keriso o le Au Paia o Aso e Gata ai i Sapulu, ae ulufale atu ai i le lotoā lē ua maliu ma se isi taulealea.

Na fautuaina ai e se tasi o le to’afā ua molia e lē talafeagai lona laei o se mitiafu ma tulafono a le ekalesia mo tagata e ulufale i le lotoā. O lē ua maliu sa faasua’ava ma o le fautuaga na ave iai o le mafuaaga lea o le vevesi na tupu ma faaoolima ai i latou ua tuua’ia i lē ua maliu. O le faasalaga maualuga o le solitulafono ua faamaonia faasaga ia i latou e to’afā, o le nofosala i le falepuipui i le olaga atoa. 

Scroll to Top

Keep uptodate with Radio Samoa activity & promotion

* indicates required