Ua faaauau nei ona tatala i tua i ni aiaiga ia Gafa Tauafaō o Malie e faatali ai le lauina o lona faasalaga ina ua faamaonia e le faamasinoga e ala i mau a leoleo sa suesueina, lona moliaga o le avetaavale faatamala na mafua ai ona oo le maliu i se isi tagata.
O lē na fano le soifua o Zhang Dong Mei o se tagatanuu o Saina.
O lē ua molia sa ia aveina lana taavale o le ituaiga o le Getz ma sa malaga mai ma se isi tagata mai Malie agai i Apia i le vaveao o le Aso Sa, 24 o Setema o le tausaga na te’a nei, ae ina ua oo mai i Vaiusu e latalata i Vailoa i le nofoaga o loo vaaia ai i taeao o Aso Sa laulau faatau i’a ae lavea ai loa lē ua maliu ina ua taia i le taavale sa faafoeina e Gafa.
O faamaumauga ia a leoleo sa tuuina atu i suesuega a le faamasinoga sa saili ai pe moni o lē ua molia sa faafoeina le Getz na lavea ai lē ua maliu, ae poo le ā foi le ituaiga o saoasaoa na alu ai lana taavale.
O lē ua maliu sa alu atu i se taavale van o le ituaiga o le Voxy ma sa tu i le ogatotonu o le auala lea e iai laina tositosi papa’e ae sopo i le ituala i tai i le vaega o loo iai le laulau faatau i’a.
O lona kolosiina o le auala na taia ai loa i le taavale.
O sailiiliga a le faamasinoga e lē gata ina faamaonia le moliaga o le avetaavale faatamala ua mafua ai ona maliu se tagata, ae na faamaonia ai foi na sili atu i le saoasaoa faatulafonoina na alu ai le taavale Getz sa aveina e lē ua molia.
Sa teena e Gafa lea moliaga, ae sa ioe i le moliaga o le lē tu i le taimi o le faalavelave e vaai poo iai se tagata na manu’a.
O le Aso Gafua o le vaiaso nei na aumai ai le faai’uga lenei a le Faamasinoga Maualuga.
