Ua faamaonia mai e 211 le au taalo a Niu Sila mo taaloga o le Olimipeka ma o le au taalo aupito I toatele lea a le atunuu ua auina atu I se Olimipeka.
O le au taalo e aofia ai tamaitai e 101 ma le 110 o alii ma ua faamoemoe e auai I tausinioga o taaloga e 22 e aofia ai ma isi taaloga fou ua aofia I le Olimipeka o le tausaga nei, le karate ma le surfing.
E 33 o I latou o loo aofia I le au e iai tupuaga Maoli ma le tagata taalo aupito I laititi e 17 tausaga ole tamaitai o Erika Fearweather e aoga I le Kavanagh College I Dunedin. O le tagata aupito I matua o Bruce Goodin 51 tausaga.
O le uluai taimi foi lea o le a tauave ai e se alii ma se tamaitai le fu’a a Niu Sila ile sauniga e tatala aloaia ai taaloga . O le tamaitai kapeteni o le Black Ferns Sarah Hirini male alii taalo o Hamish Bond o le a taitaia le solo a Niu Sila I lea faamoemoe.
O le toatele o le au taalo e mai Aukilani ma o le toa 118 o I latou ia o le uluai taimi lea o le a tausinio ai I ia taaloga tetele o le lalolagi. O le tamaitai lauiloa o Dame Valerie Adams o le a faamauina foi ile tala faasolopito o taaloga,o le tamaitai lona lua I Niu Sila ua mafai ona ausia le auai I Olimipeka e lima.
O le aso 17 ole masina nei e muai taunuu ai le au soka a tamaitai I le aai e faia ai taaloga o Tokyo ma o latou foi o le a muai taalo e fetaui ma le au a Ausetalia ilea so 21 o le masina nei lava.
