E ui e lei auai se sui o le faigamalo a Samoa e tali atu ma talia le sainigalima mai ia i latou sa tuufaatasia le savali filemu na faailoa ai lo latou naunau e lagolago Samoa i le taofia loa o le taua i le nuu paia, o le saunoaga tusitusia mai le sui o le Samoans for Cease fire, o loo faamanatu atu ai i le Malo o Samoa lana lagolago na ave i le taofia o le taua i Ukraine.
O lea finagalo o le tatou Malo sa faaleo i le tauaofiaga a le fono a Malo Aufaatasi o le aso muamua o Mati o le tausaga na tea nei 2022.
Na faailoa ai e Samoa lona matuā unaia o le filemu ma talosagaina ai i latou uma o aafia i le taua faasaga ia Ukraine ina ia taofia loa le taua.
I le saunoaga tali tusitusia mai le Samoans for Cease Fire i Isaraelu o loo faaolooloma’au ai i le tatou Malo ina ia faia foi lea lagolago na ave mo Ukraine i le taofia o le taua i Isaraelu.
