O faamaumauga mai suesuega a se tasi o faalapotopotoga ua faaigoaina o le Human Rights Measurement Initiative na faalauiloa i se faatasiga a sui auai mai ofisa o loo ogatasi a latou auaunaga ma nisi o mataupu e fitoitonu ai aiātatau a soo se tagata.
Saunoa Galumalemana Rona Lee o le Sui mai le Iunivesite o le Pasefika i Saute i le tāua o nei faamaumauga.
“O le asō lea na auai ai nisi o loo galulue i auaunaga e taumafai lea ia alualu i luma pe ausia nisi o aiātatau e le gata i Samoa ae o le Pasefika.”
“O le H.R.M.I. o le isi lea vaega o loo taumafai i se suesuega poo alualu i luga taumafaiga a le tatou Malo poo nisi o loo faia faaiuga tatau mo le ausia o nisi laasaga o loo taumafai ai o tatou tagata i le Pasefika.
“O le faamoemoe ina ia faalauiloa ia data poo faaiuga o suesuega poo survey o le 2023 ia o loo maua ai nisi o faamaumauga e iloa ai poo sologa lelei taumafaiga a le tatou Malo ma faalapotopotoga eseese pe iai foi ni vaega e moomia le toe faaleleia atili.
“O vaega eseese uma o loo aofia i nei faamaumauga poo ausia aiātatau a tina ma tamaitai, o i latou o loo iai aafiaga tumau o le soifua, o tusitala ma nisi.”
Faailoa e Galumalemana o le auga tonu o lenei faalauiloa ina ia mafai i faalapotopotoga ma vaega taitasi o loo feagai ma auaunaga i mataupu o loo aafia ai tagata soifua ina mafai ona faaaogā nei faamaumauga e molimauina ai ni mataupu.
“O i latou o loo feagai ma le fesoasoani atu ia i latou o aafia, faataitaiga o sauaga, o faamaumauga nei e ao ona faaaogāina e lagolagoina ai le tulaga o lenei mataupu o loo tatou aafia ai.
“E pei ona silafia e le mafai ona tatou faapea atu o loo faaseā tagata ona o lea mataupu, leai e tatau ona iai ni faamaumauga e molimauina ai lenei faaseā.
“O lenei auala o faamaumauga e aogā foi mo o tatou sui o loo faia filifiliga aemaise i latou o loo galulue i le fausiaina o ni faiga faavae poo ni tulafono e toe silasila ai i faamaumauga i tulaga e lagolagoina ai se mataupu poo se tulafono.”
O nei faamaumauga sa tuufaatasia lea i le masina o Fepuari o le tausaga nei ma o loo aofia uma ai vaega eseese o atinae a atunuu taitasi o le Pasefika.
