O taumafaiga a le Malo e ala atu i auaunaga ma tautua a faalapotopotoga tuma’oti o loo faia faalauiloa e tafiesea ai sauaga faasaga i tina ma tamaitai ma alo teine laiti o le atunuu, ua mae’a tapena ai e le faalapotopotoga o le Toomaga mo ē Puapuagatia se pepa faalauiloa o faamatalaga tau tulafono.
O le autu o ia faamatalaga, ia malamalama ma silafia ai e le lautele o le atunuu, poo ā tulafono e fesoota’i i o latou aiātatau, a o ā foi tulafono e tatau ona latou lē solia, ina ia alofia ai le solia o ia tulafono e fesoota’i i gaioiga e ono aafia ai i le faia o ni sauaga, aemaise i mataupu faapea e tutupu i le lotoifale o aiga.
Ua faailoa e le faalapotopotoga o le Toomaga, ua tufatufa atu ia pepa poo brochure i Matagaluega ma Faalapotopotoga a le Malo, ma le faamoemoe e faaoo atu foi i totonu o ekalesia e tauala atu i o latou sui i totonu o nuu ma afioaga, ina ia avanoa ai le lautele o tagata ona latou maua ma faitau iai.
O le Toomaga mo ē Puapuagatia o se faalapotopotoga tuma’oti ua ave iai e le Malo ni vaegatupe latou te faatino ai polokalame faalauiloa i le faamoemoe e fesoasoani i le taofia o sauaga i totonu o aiga, aemaise lava o sauaga faasaga i tina ma tamaitai ma fanau teine laiti.
