O le talosaga a Levi Saleimoa mo se poloaiga a le faamasinoga e taofia le galuega o le fuaina o tuaoi o eleele o le nuu o Afega, na faailoa ai i le talosaga le faanoanoa o le nuu i le faatinoga o tiute o leoleo i le taimi na faia ai le galuega, ona na faailoa e le matai o Levi Saleimoa na fofogaina le talosaga le susuga Umuiletainafiletuamasaga Pati Muaau, na umia e Malu o le Malo aupega o laaumalosi sa latou faapāpā a o faatino le galuega.
Faailoa i le talosaga o se gaioiga ua lē tusa ai ma le tulafono aemaise o le tausia o le filemu.
Peitai o le tali tusitusia a alii ma faipule o Afega i le talosaga na faaalia ai e le tofa Maulolo Tavita Amosa i luma o le faamasinoga, sa faamanu’alia se taulealea o le latou nuu i se pulufana mai se laaumalosi na faapāpā e se tasi o le nuu o Levi Saleimoa i le amataga o le galuega.
Na faailoa foi e Maulolo i le tali tusitusia a lo latou nuu, o le umia e Malu o le Malo o laaumalosi na faia ina ua iai lē faatagaga faaletulafono e mafua ona o tulaga na aafia ai se tasi o lo latou afioaga i le laaumalosi.
E lē o iloa poo faia se suesuega a leoleo i le umia ma le faaaogāina o laaumalosi i le taimi na faatino ai le galuega o le fuaina o tuaoi o fanua o le nuu o Afega ma Levi Saleimoa.
