Ua to’afa sui faipule o le Palemene ua saunoa i le tala faatatau autu o le tupe lea o loo talanoaina ai nei e le fono aoao faitulafono ma le naunautaiga e tatau ona pasia a’o le’i maea le masina lenei o Setema.
O nisi o sui faipule o le uluai taimi lenei ua seei ai i le tofi o a latou itumalo ua maea a latou saunoaga faataupou e pei o le sui faipule o le Aiga i le Tai susuga Auapaau Mulipola Aloitafua na talamalae i se saunoaga faalauaitele i le Aso Lua sosoo ai ma le sui faipule o Faleata No.1 le tōfā Manuleleua Paletasala Tovale faapea le sui faipule o le Lefaga ma Faleaseela le tōfā Masinalupe Makesi Masinalupe, o le sui faipule o Gagaifomauga No.2 le afioga Vaele Paiaaua Iona Sekuini ma le sui faipule o Vaisigano No.1 le afioga Niuava Eti Mālolo.
O le asō le aso lona tolu o le fono aoao faitulafono lona 17 a le Palemene ma o loo faaauau ai saunoaga faaminisita ma saunoaga faataupou a sui faipule e to’a 25 a le Palemene o loo iai nei.
E le’o mafai lava ona auai le isi vaega o faipule filifilia o le pātī faaupufai a le vaega e Puipuia Aiā Tatau o Tagata le HRPP ona o le faatonuga a le Fofoga Fetalai e lē mafai ona auai i le fonotaga a le Palemene.
