Ua faaauau nei ona su’esu’e e le Faamasinoga Maualuga a le atunuu se tagi o se su, faasaga i ni leoleo tamaitai e to’atolu na latou pu’eina ma taofia ma molia se tamaitai na tuua’ia, e faapea o ia lea o OLP sa faia faasalalauga taufaaleaga ma faapaia mata i auala o fesoota’iga i le api o foliga.
Sa faaulu lea mataupu tau faamasinoga e lē na molia e leoleo, o ia lea o Katerinauatalia Talosaga Maria Toilolo Egelani Lesatele, ina ua toe faaui i tua e leoleo ona moliaga ia Iulai o le tausaga e 2017 ina ua leai ni mau a leoleo e lagolago ai tuua’iga solitulafono.
E 450 afe tala le aofaiga atoa o le tupe ua su ai e lea tamaitai le Minisita o Leoleo, ma tamaitai leoleo e to’atolu o Berre Isopo, Saisirita Tufuga, ma Hanania Lene.
O le autū o lea tagi ona ua tuua’ia pe molia sese, ma pu’e sese foi e leoleo lē na molia ae lē o ia lea o OLP.
O le lima foi aso na nofo taofia ai lē na molia, o le isi lea finauga o le su, ona ua faatino lea tulaga i se gaioiga solitulafono e aunoa ma ni mau maumaututū a leoleo e faamaonia ai.
Na faaulu e leoleo e to’atolu se talosaga i le faamasinoga e ta’ua o le strike out motion, o se finauga faaletulafono sa tuuina atu ai ni mau e finauina ai le taofia o le su’esu’eina o le tagi poo le su na faaulu faasaga ia i latou.
O le tausaga e 2020 na mae’a ai ona su’esu’e lea finauga, ae o le Aso Lulu o le vaiaso nei na faato’ā aumai ai le faai’uga ma ua teena ai lea finauga.
Ua poloa’ina ai e le faamasino le afioga Fepuleai Ameperosa Roma lē na faauluina le su, ina ia faia nisi teuteuga o lana finauga faasaga ia i latou o loo ia molia, ma tuuina atu ai lana mataupu tau faamasinoga e fofogaina i le aso 4 o le masina fou o Novema.
O le valaauga lea o le a faatulaga ai se aso e su’esu’e ai.
Ua ave le faamaulaloga a le faamasinoga i lē na faauluina le mataupu lenei, ona ua umi o faatali le faai’uga, lea ua lata i le fā tausaga o faatali.
