O le taamilosaga lakapi taitoafitu a le kalapu o le Malisi i le faaiuga o le vaiaso fou, o le a faia ai mo le taimi muamua se vaega o le taamilosaga o le a tauva ai ‘au e lē o ausia le vaega pito i luga mo le Ipu o le siamupini o le taamilosaga atoa.
O lea vaega o le taamilosaga o le a maua ai e le ‘au e manumalo le Ipu o le a manatua ai se tasi o tamalii o le kalapu sa avea ma Pelesetene le afioga Muagututi’a George Meredith ua tuumalo.
Faaalia i se pepa o faasalalauga mai le kalapu a le Malisi, e tele isi suafa na tuuina atu mo le filifiliga ae na taunuu lea filifiliga i le afioga Muagututi’a George Meredith ona e maoa’e lona sao i le kalapu ae o se tagata foi e fiafia tele i le atina’e o le taaloga lakapi.
Sa avea o ia ma sui Faipule o le Palemene mo le itumalo o Aleipata Itupa i Lalo.
O le amanaia e le Malisi o lea tamalii i lana taamilosaga lakapi taitoafitu lona 36 ua avea ai le kamupani o le Digicel ma lagolago autu poo le major sponsor, ua faauau ai pea ona faaaloalo ai foi ma manatua e le kalapu se isi tamalii le afioga Tupua Fred Wetzell ma lona faletua ua tuumalo, i le Ipu mo le ‘au o le a siamupini i le taamilosaga.
