O le taaloga i le va o le au a le atunuu le Manu Samoa ma le au a le Barbarians lea na fuafua e faataunuu i le faiauga o le vaiaso i Twickenham e le’i faataunuuina ona ua faamaonia le aafia o nisi o le au ma le pulega a le Barbarians i le Koviti19.
O se faaiuga na faalia ai le faanoanoa o nisi o le au a le atunuu aemaise lava le alii ia Joe Tekori lea na faamoemoe o lana taaloga mulimuli lea e taalo ai mo Samoa. Taua e Tekori sa iai lona naunautaiga e taalo ai mo lona atunuu i le taimi mulimuli peitai ona o puipuiga lava mai le faama’i lea ua le taunuu ai le taaloga.
Na maua e tama taaalo le tala i le lē faataunuuina o le latou taaloga ina ua taunuu atu i le faletaalo (stadium) ae faailoa atu loa e a latou faigaoga iai latou. Taua e Tekori na vaaia le filemu o totonu o le potu taalo ma vaaia foliga faanoanoa o tama taaalo.
E toatele nisi o tama taalo lea na iai le faamoemoe o le taaloga muamua lea mo i latou ua fai ai ma sui o le Manu Samoa.
