E lē to’atele ni ta’ita’i o le lalolagi e masani lelei i le ta’ita’i o Lusia o Vladimir Putin peitai o le ta’ita’i o Belarus, Alexander Lukashenko, o ia lea e malamalama lelei ia Putin ona o le umi o le la mafutaga.

Ina ua fesiligia e le ‘autusitala i le vaiaso nei Lukashenko i sona finagalo i le auai ane o fitafita a Korea i Matu i Lusia mo le aveina atu e tau faasaga ia Ukraine, na faailoa ai e Lukashenko o otaota uma ia faamatalaga e tuua’ia ai Putin, fai mai a ia e lē taitai ona faia e Putin se gaioiga faapea ma e lē taitai foi mana’o Putin e aofia atu se ami a se isi atunuu i le faagaioiga o le ami a lona atunuu.

E manatu Lukashenko afai ae taunuu faamatalaga e pei ona feavea’i nei ma o le a faaaogā e Lusia fitafita a Korea i Matu e tau mo latou faasaga ia Ukraine, e lē taumate o le a aveina ane loa le fitafita a le NATO i Ukraine.

Na fesiligia foi le ta’ita’i o Belarus pe iai se taimi ua talosaga atu ai Lusia mo ni ana fitafita i le taua faasaga ia Ukraine, tali Lukashenko e lei iai se taimi ua talosagaina ai i latou i lea tulaga e ui e iai se vaega a Belarus na faia i le taua a Lusia ma Ukraine i le amataga lava i le 2022 na faaaogā ane ai e Lusia isi teritori o Belarus e fai ane ai ana osofa’iga ia Ukraine.

Ina ua fesiligia pe ua sauni e faataga le faaaogāina o a’upega faaniukilia a Lusia o loo i ona teritori e faasagatau ai ia Ukraine, na ta’ua e Lukashenko o ia ua sauni ae se’i vaganā lava ua laasia e se fitafita mai se isi atunuu ona laufanua. 

Puna o Faamatalaga: https://www.bbc.com/news/articles/c62938gl6q1o