Ua maualuga ma matie le faamoemoe a le Ekalesia S.I.S.D.A.C. (Samoan Independent Seventh Day Adventist Church) i le aso na faaulufale aloaia ai le latou malumalu fou i Magele ina ua auai mai ai le afioga i le Ao Mamalu o le Malo o Samoa, Afioga Tuimalealiifano Vaaleto’a Sualauvi II faapea ma lana masiofo ia Faamausili Leinafo Tuimalealiifano, ae le gata i lea o le afioga i le tamaitai Palemia o le malo le Hon Fiame Naomi Mata’afa, ae faapea foi i le Konesula i Aukilani Afioga Afemata Palusalue Faapo II.
Na auai mai ai foi le sui o le malo o Amerika Samoa faapea le tele o susuga i faafeagaiga ma o latou faletua mai nisi o tovine eseese faapea aiga uo ma ē masani e patipatia faatasi le taulaga o le faafetai i le Atua ona o lenei galuega tele sa gapatia ma le ekalesia.
O le faamoemoe ua taunuu o le laau lea o le soifua ae o le tele o lima e māmā ai se avega, o le galuega sa tausoa faatasi ma tutu faatasi ai matagaluega e 22 o le ekalesia o loo aumau i atunuu eseese o le lalolagi e pei o Amerika, Ausetalia, Samoa ma Niu Sila nei ina ia fausia se malumalu i le nofoaga autu o le ekalesia o loo tapuvae tasi uma iai galuega fai o le galuega a le Atua.
O le tausaga 2019 na amata fausia mai ai le galuega peitai sa tele ina fai ma taofi le faatinoina o le galuega ona o le taimi sa aafia ai tatou i le faama’i o le koviti.
E tele luitau sa feagai ma le ekalesia a o galulue punouai ai, ae petai ua saunoa le susuga i le taitai aoao o le ekalesia le susuga ia Pastor Alaimoana Willie Papu e faapea, E lelei, E lelei, E lelei lava le Alii, ona o lenei galuega o se galuega tele lava, e silia i le 30 miliona lona tau, ae sa maitauina lava le galulue ma le faamaoni ma le faatuatua o tagata uma e ala i le tagi i lima ma le afu sisina o le faatinoina o le tautua i le Atua ma lona finagalo.
O le lagona fiafia foi o le faauluuluga o le ekalesia ia Pastor Alaimoana Willie Papu faapea matagaluega uma o le ekalesia sa auai ona ua faaulufale lenei malumalu tapuai ae ua mafai ona auai mai sui o le malo latou te molimauina lenei galuega.
O lana molimau foi i ona uso auauna faifeau i le talalelei ale Atua, o lea ua tatala le fale, o le fale mo tataou uma, e faatunuuina ai soo se mea e mananao ai pe a manaomia le fesosoani.
O le S.I.S.D.A.C. le igoa o le lotu sa iai ae o lea ua tuuina iai ma le isi igoa o le Universal Remnant Church of the Living God e mafua mai i le mau a le 1 Timoteo 3:15 e faapea, ia iloa lau amio e tatau ai i le fale o le Atua, o le ekalesia lea a le Atua Soifua o lona faavae ma lona poutu o le upu moni a le Atua.
O le saunoaga a le afioga i le tamaitai Palemia o Samoa ia Hon Fiame Naomi Mata’afa na ia momoli ai lana faamalo ma lana faafetai i le taitai o le ekalesia faapea nofo a tofi o le ekalesia ona o le galuega mae’ae’a lea ua tu ai le malumalu o le ekalesia i lona laumua i Magele.
O le taulaga fau faatasi lea auā le faatalaleleina o atunuu uma mo le Atua ma lona malo, ma o le faavae mausali lea mo le atunuu.
Ia avea lenei malumalu matagofie ma lamepa pupula mo tatou tagata o loo aumau i lenei atunuu aemaise o tafa e fia o le ekalesia e pei ona autovaa mai i le tatalaina o lenei malumalu.
Sa faapea ona saunia se taumafataga tele e faaauau ai le mafutaga fiafia i tagata uma sa auai faapea ma faafiafiaga na salani ai ma faafiafia ai le mamalu o le auvalaaulia.
Ae taualuga ai loa i faaaloaloga masani e pei ona masani ai aso faapenei.
O le susuga ia Maulolo Folo Faaumuumu sa fai ma sui o le ekalesia e tu totoo i le taimi o faaaloaloga.
