Fire
Photo by Fire & Emergency Services Samoa

Aso Faavaomalo mo auaunaga tineimu ma faalavelave faafuasei

Ua ave le faamālō a le Minisita o Tineimu ma Faalavelave Faafuasei le afioga Faualo Lefau Tauiliili Harry Schuster i le galuega a le au fuimu i totonu o le atunuu aemaise lava o le amanaia ai o le latou galuega i le lalolagi atoa. 

Ta’ua e le Minisita e tatau i le atunuu ona patiapatia ma faamanatu le aso faapitoa mo le auaunaga a le tineimu. O le aso 4 o le masina o Me o le aso lea ua atofaina e manatua ai ma amanaia le galuega a fuimu uma i le lalolagi. 

O le autū o lenei tausaga ua faaupuina i le gagana peretania “Reminisce with Gratitude, moving forward Diligently in Faith” o lona uiga “Tepa i tua ma le loto faafetai, tamo’e punoua’i ma le loto faatuatua”. 

O le feau na molimoli atu e le Minisita ia i latou o loo galulue i lea galuega o le faafetaia lea o le auaunaga a alii ma tamaitai tineimu uma ma lo latou sao i le puipuiga ma le saogalemu o soifua ma meatotino ma le siosiomaga. 

O se aso foi e manatua uma ai i latou sa auauna ma tautua i lea matātā a le malo o Samoa mo le saogalemu ma le tali atu i faalavelave tutupu faafuasei ae e le gata i lea o i latou ua fai i lagi le folauga a’o galulue ai i le Matagaluega mo le puipuiga o le atunuu. 

Scroll to Top

Keep uptodate with Radio Samoa activity & promotion

* indicates required