Saunoa se faamasino Amerika e mafai ona ia ta’ua o Trump ma lana faigamalo o loo latou solia tulafono tau le faamasinoga ona o le lē usita’ia o le poloa’iga e taofi le faaauau pea o faigamalaga o loo tipoti ai tagata i El Salvador mai lava i le masina na te’a nei.
Fai mai ua toe lalaga ai e le faigamalo se tulafono mai le silia i le 200 tausaga talu ai sa puipui ai le malo tele i le taimi o taua e fuafua e feavea’i ai se vaega tele o tagata.
Lipotia e le BBC le faamatalaga mai le faamasino Amerika lea o James Boasberg, e oo mai lava i le taimi nei e le’i faia lava e Trump ma lana faigamalo se gaioiga e faasa’o ai pe faamalamalama ane foi a latou gaioiga ua solia ai le tulafono.
O le faai’uga la a le faamasino lea ua faia ua tatau ona amata taualumaga o le mataupu lea i le faamasinoga ua afua ai se feeseesea’iga i le va o le Fale Pa’epa’e ma le faamasinoga i le mataupu i malosiaga o le Peresetene.
Ua ta’ua i le lipoti o le aso 23 o le masina nei ua tuu atu iai afai e mae’a lea aso ae le’i tuuina atu se faamatalaga e tusa o le mataupu lea, ona faagasolo loa lea o fuafuaga a le faamasino lea i le isi laasaga e sosoo ai.
Puna o Faamatalaga: https://www.bbc.com/news/articles/c045qg9xr30o
