Ua malaga atu i Niu Sila mo se mālōlōga puupuu le ofisa sinia o le fitafita o le puipuiga a le Malo o Niu Sila o Commodore Andrew Brown, o loo avea ma sooupu i le faailoaina o le tulaga i galuega o le aveesea o suāuu mai le manuao o loo goto i gataifale i Saute o Upolu le Manawanui, ma ua ia faailoa ai o le avanoa tāua lea e feiloa’i ai i sui o le malo o Niu Sila ma ē o loo ta’iulu i le galuega i le aveesea o suāuu ma isi uma meatotino a le manuao ina ia malupuipuia le saogalemu o le si’osi’omaga o le gataifale o le atunuu.
Ua faailoa e Commodore Brown i lana lipoti lata mai ua silasila nei, a mae’a ona aveesea suāuu, o le a amata loa ona faatino le galuega o le aveesea o a’upega e pei o laau malosi ma ututau o loo i luga o le manuao.
O se galuega e mana’omia ai ni tagata maulu e iai le poto a’oa’oina i le aveesea o ia meatotino ina ua mautinoa le saogalemu o le ogasami o loo goto ai le manuao.
O loo faamālōlō le lagisi i le taimi nei e lē o faia sana galuega i le la’uina ese o suāuu ma la’u i tane o loo i luga o le uafu tele i Apia, ona o loo faaletonu le tau.
Ae i se lipoti a le leitio a Niu Sila i le vaiaso nei, o loo faailoa ai e se tamalii o le itumalo Safata le afioga Tuia Paepae Letoa, e ui ina ua aveesea le tapu mai ogasami sa lē mafai ona fagotaina peitai o loo malosi pea le manogi o suāuu na masaa i le gataifale, ma o se tulaga o loo faaeteete iai i le taimi nei.
