O se tala faanoanoa mo si aiga talavou i Perth, le motusia faafuase’i o le mafutaga ma le tamā o le aiga, o Mika Tua, 29 tausaga o lona soifua, ina ua sipaka i le uila a o faatino ai ana galuega tālaau i Perth.

O le aso 23 o le masina lenei o Iulai na tulai mai ai lenei faalavelave i Maida Vale, i se vaipanoa maotua i le itu i sasae o Perth, pe tusa o le 1.30pm i le aoauli, ma nanati atu ai le vaega o faalavelave faafuase’i ina ua lipotia ai se tagata o loo sipaka a o faatino ana galuega.

O loo ta’ua i lea lipoti e foliga ua pipii atu meafaigaluega a Mika i uaea eletise.

O Mika Tua na malaga atu mai Niu Sila, ma ua fai si ona aiga, le tamaitai o Shirley ma se fanau laiti e toatolu, MJ Luea, Liliu-Aoina, ma Jahziel.

O le itu faanoanoa i lenei faalavelave, ona o lea ua maliu faafuase’i le tamā sa na o ia e faigaluega mo le tausiga o si ona aiga, ma e telē le lu’itau ua fesaga’ia nei e le tina talavou ma si ana fanau.

O le ala lea ua faaatulaga ai e se tasi o uo a le aiga, Angelene Sua-Sagapolutele se GoFundMe page e saili ai se seleni mai le aao mafola o soo se tasi, ina ia fesoasoani atu i si ona aiga a o taumafai ai nei e tau faamasani i le suiga faafuase’i ua iai le tausiga o le aiga, aemaise foi o le a fesoasoani i le tapenaina o toe sauniga o le tamā.

I se faatalanoaga a le 9News ma le tina ia Shirley, na ia ta’ua ai e lei talitonu ina ua oo atu le tala ia te ia i si ona toalua, ae ua na o le faufaue’e.

Na ia ta’ua, o lana masani e na te fafagu lona toalua i le taeao e tapena mo lana galuega, fai iai sana iputi ma faamanatu ia Mika, ‘Honey please be safe’, ae o le aso na tupu ai le faalavelave, o se taimi muamua lea e lei faia ai e Shirley lana faamanatu masani lea i si ona toalua, ae pagā lea ua faafuase’i ai ona mou ese atu.

O le iva tausaga talu ai na masani ai Mika ma Shirley i le lotu, ma amata ai ona faufau mai le la mafutaga seia oo ina faatasia ma maua foi le la fanau e toatolu.

O i latou uma e iloa Tua e latou te manatua o se tamā lelei tausi aiga, e fiafia tele i taaloga ma e iloga i le leotele o lana ‘ata.

Tau ina ia faamaise le agaga o le Atua i si tina faanoanoa ma le fanau.