E lē toe foi pe faalagolago Niu Sila i tagata faigaluega omai mai atunuu i fafo ae le lelei totogi, poo le maualalo foi o agavaa.
O saunoaga nei a le minisita o femalagaiga, Kris Faafoi a’o faailoa mai ai e le malo ananafi le suiga tele mo le Immigration a Niu Sila lea o le a faapaleni ai le tatau ona faafaigofie ona maua nofomau o tagata faigaluega mai fafo, pe afai ae totogi lelei.
O se suiga ua faamanino e Faafoi e le toe foi Niu Sila i le mea sa iai ae e le’i sau le Koviti, lea sa tele ina faalagolago i tagata e maualalalo agavaa ma tomai mai isi atunuu ma tele ai ina omai e lē lelei ona faafaigaluega poo le lē lelei foi ona totogi.
O le suiga ua agai iai o le a moomia ai le tatau ona totogi e le fale faigaluega o loo saili mai isi atunuu ona tagata faigaluega o le median wage lea e $27.76 i le itula.
E iai lava fetuunaiga e mafai ai ona le faamalieina lea totogi, peitai e tatau la ona sili atu mai le minimum wage lea o loo $21.20 i le itula.
Ese mai i totogi, o se suiga foi o loo vaavaai ai ia vave ona maua avanoa nofomau o tagata o le a omai, ma e iai nisi o galuega o le a vave maua nofomau na i lo isi.
O le a lē aafia i lenei suiga tagata faigaluega ua mae’a umia visa e aofia ai visa faigaluega.
Mai le taitai o le National, Christopher Luxon o ni suiga lelei peitai e ono le vave maua visa ona o le tuai o le Immigration.
