O tapenaga a Samoa i le fono a Malo o le Taupulega ua toe 3 nei masina ona oo lea i le masina o Oketopa e faatino ai lea faamoemoe tele o le Malo ma le atunuu, ma ua faailoa vave ai nisi o tapenaga.

O le uafu tele i Apia o le a taula ai se meli la’upasese tele o le a faaaogā e nonofo ai nisi o usugafono ma tagata e pei o le aufaasalalau o le a malaga mai mo lea fono faavaomalo e 56 atunuu o le a auai.

Ua faailoa ai nei e le pulega o uafu ma taulaga le tapunia o le uafu tele i Apia mo aso e valu mai le Aso Toonai 19 o Oketopa e oo i le Aso Toonai 26 o lea lava masina.

O le meli ua faaigoaina o le Pacific Explorer o le a taula i le uafu autu o le atunuu mo lea taimi atoa a o faagasolo le fono a ta’ita’i o Malo o le Taupulega.

O tapenaga foi mo lea fonotaga tele faavaomalo ua faailoa ai nisi o nofoaga o le a faaaogā mo lea faamoemoe, e pei o le faletalimalo o le Tanoa, faletalimalo o le Sheraton Aggie Greys i Apia, Sheraton Samoa Beach Resort i Mulifanua, o le potu mo fonotaga tetele i le maota o Tui Atua Tupua Tamasese Efi i Sogi, o le potu fono poo le Tuanaimato Conference Center, maota o Tupulaga a le Ekalesia Faapotopotoga Kerisiano Samoa i Mulinuu, ma le Maota fono o le Palemene.

Ua faailoa foi i pepa o tapenaga le avea ai o le nofoaga o faasalalauga a le leitio a le Malo, le 2AP i Mulinuu ma nofoaga e tapuvae tasi uma iai galuega tau faasalalauga poo le media center, e faaaogā e tagata faasalalau ma tusitala o atunuu eseese mai fale televise, o nusipepa, leitio, ma isi auala o faasalalauga i luga o fesootaiga tau initaneti, mo le faasalalauina o taualumaga o le fono a Malo o le Taupulega o le a usuia i Samoa.