O le faaili o le Vaatofu sa lotolotoi ai le afioga Faumuina Lale Von Talo i Niu Sila a o faamautu ai o ia i le 20 tausaga, ae o le tausaga e 2017 na toe taliu mai ai i Samoa ma faaauau ai lana taleni o le musika e ala i le faaili ua faaigoa o le Pacific Love Band lea na sola ma le siamupini o se tasi o faaaliga tele o musika faaili i Samoa.
Ua faailoa i fesootaiga televavave le social media le faamanavaina o galuega i le ola nei a lea tamalii poo se tama fanau a le atunuu ua lauiloa i le musika.
O le afioga Pulotu Canada Alofa MaCarthy o se tamalii na te silafia lelei le afioga Faumuina Lale Von Talo, i le taleni o le musika ma le fai faaili.
O lana molimau o le maliu o lea tamalii ua motusia ai se isi sootaga lelei o tagata e fiafia i fatuga ma musika i totonu o Samoa.
Le susuga Pulotu Canada Alofa MaCarthy.
O le faaili o le Pacific Love Band e silafia e le toatele i sauniga e pei o faaipoipoga ma aso soifua e faafiafia ai, aemaise foi o faaaliga o musika faaili na faia i ni tausaga e lei mamao atu, lea sa sola ai le Pacific Love Band mai Salafai ma le manumalo.
