A o faagasolo ai taualumaga a le fonotaga 28 a Malo Aufaatasi i mataupu e agai i suiga o le tau ma le siosiomaga o loo unaia ai pea le faatinoina o le pitolaau a le li’o o atumotu laiti tauatiae lea o loo Taitaifono ai lo tatou atunuu.
I faamatalaga tusitusia a le Ofisa o Polokalame faalesiosiomaga a le Pasefika le Secretariat of the Pacific Regional Environmental Programme (S.P.R.E.P.), o loo faailoa ai o loo talosia pea lenei fonotaga ia faapupula atili ai malosi le unaia o faatinoga agai i suiga o le tau.
Saunoa le Afioga ia Toeolesulusulu Cedric Schuster, o le Minisita a le Matagaluega o Siosiomaga i Samoa e tusa ai o le auai ai i lenei fonotaga.
“Ua o matou omai ma le naunautaiga mai vasa e fia ma le feau o le a tele le sao o lenei fonotaga i lona faatinoina.
“O le galulue faatasi o le itu tāua lea lea e manaomia ma ia faanatinati vaega uma e puipuia ai o tatou atunuu mai suiga o le tau.
“O matafaioi foi o loo tatou galulue ai e matautia ae mafai lava ona faatino, e ao ina faalagolago i vaega mai fafo e mulimulitaia auala i lenei fonotaga e ala i taiala mo atinae.”
Na saunoa le Minisita i se tasi o fonotaga ua ta’ua o le G77 ma le fonotaga a taitai ma le Malo o Saina i mataupu i suiga o le tau.
Na faamanatu ai e le Taitaifono o le li’o o atumotu laiti tau atiae Taitai o Malo o le lalolagi e tusa ai o faamaumauga mai suesuega a le Intergovernmental Panel on Climate Change poo le vaega o loo nafa ma le mataituina o vaega eseese o loo iai le tulaga i suiga o le tau.
“O le tulaga pagatia i le mae’a ai o se faalavelave faalenatura e tupu o se tasi o itu e faigata ona molimauina.
“E pei ona tatou vaai ma iloa i nisi o atumotu laiti tau atiae ua tele tausaga ua lē tulaga lelei ai vaega o atinae.
“O se vaaiga e molimau ai lo’u nei tagata mai se atunuu laitiiti o se Taitai e talosia lava e iai vaega e ao ina faataatitia i ona vaega mautu a o feagai pea ma nisi o faafitauli o loo aafia ai le soifua atiae o le atunuu.”
O Dubai o loo feagai ai Malo o le lalolagi i ona Taitai aemaise nisi o ofisa o loo iai matafaioi e uiga i suiga o le tau ma le siosiomaga.
