O le galulue faatasi o le Matagaluega o Aiga ma Agafesoota’i ma le Matagaluega o le Soifua Mālōlōina e faamaopoopo tapenaga mo le resitalaina o fanauiti e i lalo o le 3 tausaga le matutua e aofia ai pepe fou mo le faamanuiaga o le soifua manuia o fanau, ua faia ai ni a’oa’oga a sui o ia Matagaluega e lua a’o lumanai le resitala e amatalia i le Aso Gafua o le vaiaso fou.
Ua molimauina i faalauiloa o loo salalau i luga o upega tafā’ilagi le una’ia o matua ma ē o va’aia fanau e agavaa i le faamanuiaga, ina ia fa’afou ma faamae’a tui puipui o fanau, ia iai se pepa fanau, tapena pepa faamaonia o matua ma ē o tausia le tamaitiiti, ma ia tapena foi se teugātupe poo se account i se faletupe e alu iai le seleni o le faamanuiaga.
O lea faamanuiaga e pei ona faailoa lautele e ia Matagaluega a le malo e lē na o se tupe e maua ai, ae o le avanoa tāua foi lea e faamautinoa ai ua iloa ma lagolagoina fanau iti ua puipuia, ma ua vave fesootai atu i auaunaga ma fesoasoani e manaomia e i latou ma o latou aiga.
E to’a fitusefulu le ‘au faigaluega o le a galulue i le faia o le resitala lea o le a malaga i Savaii i lea so Tofi ma le Aso Faraile o le vaiaso nei pe a mae’a a’oa’oga o loo faia, ma sauni ai loa e faatino le galuega i le vaiaso o muamua nei.
O Upolu o le a faatoa lesitala fanau i le Aso Gafua 21 o Setema e oo i le aso 30, peita’i o le a fa’aauau pea le resitala i masina o Oketopa ma Novema.
