Ua faaalia manino e le Ofisa Sili o le Matagaluega o Faatoaga o le fanua i Togitogiga o loo i lalo o le vaaiga a le Matagaluega o Faatoaga ma Faigafaiva, e lei iai se sainigalima poo se feagaiga na faamautuina mo se lisi ma le malo o Amerika Samoa.

Ua faaalia i se pepa o faamatalaga nisi o fuafuaga alualu mamao a le matagaluega e aofia ai, fuafuaga mo le auina mai o sua ola o taanoa mai fafo (tulou) e faaaogā ai metotia faaneionapo e feusuai ma ia faateleina ai le lafu.

O loo iai foi le faamoemoega mo le auina mai o manupapalagi mai Ausetalia ina ia unaia ai le ola lelei o a tatou manupapalagi.

Faaalia e le Ofisa Sili o nisi o mataupu sa talanoaina ma fefaasoaai ai Matagaluega o Faatoaga ma Faigafaiva a atunuu e lua, i auala ma fuafuaga e unaia ai le galulue faatasi i mataupu tau faatoaga ma faigafaiva e pei ona ave ai le faamuamua a atunuu e lua, mo le faateleina o taumafa.

Ma sa auina atu ai e le Matagaluega o faatoaga a Samoa le 600 faisua ma tilapia i Amerika Samoa faatasi ai ma aoaoga mo le aufaigaluega i le faafaileleina lelei o na faisua.

Peitai i le faaopoopoga o lena fesoasoani mo Amerika Samoa, o le a auina atu foi le 5 manupapalagi ma le 5 mamoe i se aso o lumanai ma o le taimi nei o loo tausia lea lafu i le lotoa i Vaea seia mautu mai tapenaga a Amerika Samoa.

Ua faamanino mai e le Ofisa Sili na afua ona faasoa ia fuafuaga tāua ia Amerika Samoa ina ia tau fai manuia ma fai paaga ai Samoa e lua mo le auina mai o manupapalagi mai fafo ma faasoa atu mo se manuia lautele.