Lauofo Fonotoe Nuafesili Pierre Lauofo
Lauofo Fonotoe Nuafesili Pierre Lauofo

“Ua iai se faatamala o le Mālō” – Lauofo Fonotoe Pierre Lauofo

Ua faaali manatu o le vaega faaupufai e Puipuia Aiā Tatau o Tagata le HRPP poo le Ituagai tauala atu i le latou sui taitai le afioga Lauofo Fonotoe Nuafesili Pierre Lauofo i tulaga ua iai Samoa ma tuuaia ai le Mālō i le faatamala ua afua ai lea tulaga. 

O loo fesiligia e le Ituagai le tulaga o le malaga togipau mai Ausetalia lea e faapea ma fuafua mo tagata galuega faavaitaimi e toe malaga atu ai i Samoa peitai ua māua nisi o faamatalaga sa malaga atu ai ma nisi o aiga e faamoemoe mo ni faalavelave faleaiga. O loo iai le naunautaiga ina ia saili poo fea tonu o loo iai le lape na afua ai ona ofi atu le faama’i i le atunuu. 

Faailoa foi e Lauofo “O le vaai ai i le tulaga ua tulai mai sa tatau ona vave lockdown le atunuu, ma tatou borders. O le malaga na taunuu mai le Aso Lulu, Aso Tofi iloa le tulaga ua iai nisi o pasese e iai le talitonuga ma se lagona sa tatau loa ona fai le faaiuga i le taimi lena, ae faatoa fai nisi sailiiliga ma fuafuaga mulimuli ane. O le mea taua sa tatau ona vave lockdown le atunuu.”

Taua foi e Lauofo “Afai e iai nisi o le aufaigaluega na o i o latou aiga poo nisi na galulue i le malae vaalele na o i o latou aiga ia o le manumanuga lena i le tulaga o puipuiga poo ua salalau le siama i tua i le atunuu.”

E ui i lea ae na faailoa e le Ofisa Sili o le Matagaluega o le Soifua Maloloina Leausa Dr. Take Naseri i le aso ananafi o sui o le aufaigaluega na iai i le taimi na taunuu ai le vaalele ma i latou ua aafia o loo faanofoesea uma i le nofoaga faapitoa e tālia ai isi iuga o a latou suega (tests). 

O loo iai foi le popolega o le sui taitai o le ituagai i tulaga o faasalalauga i le tuai ona logoina o le atunuu i tala lata mai ua iai le tapunia ai o Samoa poo le lockdown.

“Ta le 6i le afiafi ua tatala faleoloa ae faatoa sau le faasalalauga a le Mālō ua te’a le itula e 6 ananafi i le afiafi e toe faaauau le sā poo le tapu i le vaiaso lenei. E oo mai le faasalalauga ananafi o le toatele o tagata ua i totonu o faleoloa faia a latou faatau ma feoai e fai a latou feau, o lea la e matau e le tatou vaega faaupufai ma le ituagai i lea tulaga ua tulai mai ua iai a le faatamala lea ua iai, mai lape tetele ia e pei ona matau atu ua alia’e mai”.

E pei ona silafia ua oo atu nei i le to’a 20 i latou ua aafia i le faama’i o le koviti19 e aofia ai le pasese mai le malaga mai Ausetalia e to’a 15 ma le aufaigaluega e to’a 5. O le Aso Tofi o le vaiaso nei i le itula e 6 i le afiafi lea ua fuafua e maea ai le 72 itula tapunia ai Samoa talu mai le aso ananafi.

Scroll to Top

Keep uptodate with Radio Samoa activity & promotion

* indicates required