Ua sau lapataiga i le tele o visa malaga e sau ai i Niu Sila o loo toe faatau e atunuu i fafo i le tau e oo atu i le $30,000.
O le visa 6 masina na faatoa faailoa i le masina o Fepuari e saili mai ai tagata faigaluega e galulue mo galuega faamamā ona o mea na faaleagaina e le afā o Gabrielle faapea lologa i Aukilani, o le visa lata mai lea o loo toe tulei e nisi o pisinisi i atunuu e iai Initia.
O le visa foi lea talu ona faalauiloa ua silia ma le 1,900 tagata ua faatalosaga mai ai, mulimuli ai toe faaui i tua talosaga a le silia ma le 430 i lo latou lava loto faitalia.
O le visa faigaluega foi lea ua ta’ua mai e nisi o lipoti o loo faalauiloa i atunuu i fafo o le visa faigaluega e 3 tausaga ae lē 6 masina.
O Initia le atunuu o loo taulamua ai lona igoa i pisinisi ua fai i visa malaga nei e omai ai i Niu Sila ma o le tau o loo tele ina totogi e tagata o le va o le $30,000 ma le $40,000.
