Ua toe tolo atu i le Aso Faraile, aso 5 o le masina fou o Me le suesueina o le talosaga a le vaega faaupufai e puipuia aiātatau a tagata, e fia auai o se isi itu i le faamasinoga o faipule e toatolu ua faamavae ma lea pati faaupufai.
O le vaiaso na tea nei i le Aso Tofi na faatulaga muamua e suesue ai le talosaga, ae na toe valaau i le Aso Faraile ua mavae le mataupu ma toe faatulaga ai mo le aso 5 o Me.
Ae i le tagi tau palota mai le itumalo o Vaimauga 3, ua mae’a tuuina atu folasaga faaiu a loia a itu auai, ma ua faatali nei se aso e le o iloa e aumai ai se faaiuga. O le a logoina loia a itu o lenei faamasinoga i le aso e fofogaina ai.
I le faamasinoga sili o le amataga o le vaiaso nei ua faatulaga e suesue ai le talosaga a le susuga Tuilaepa L Sailele Malielegaoi, ma le tofa Lealailepule Rimoni Aiafi, e pei ona la lu’iina le faaiuga a le Fono Aoao Faitulafono i le faamalolo le tumau o o la tiute faafaipule o le Palemene mo le 2 tausaga.
