Ua tofia e le Kapeneta le Tofa Fiso Dr Fiame Leo e avea ma Ofisa Sili o Pulega o le Faalapotopotoga o Suesuega Faasaienisi a Samoa, e suitulaga ia Seuseu Dr Tauati lea ua avea nei ma Ofisa Sili o Pulega o le Matagaluega o Faatoaga ma Faigafaiva.
O le faaiuga a le Kapeneta na tuuina mai i le mae’a ai lea o lana fonotaga i le Aso Lua o le vaiaso nei.
Ua faailoa e toalima ia Fiso i latou na tusi talosaga mo le avanoa ma e toafā na faatalatalanoa.
Ua 12 tausaga o galue ai lē ua filifilia i le SROS ma e tofia nei o galue ai ma pule o le vaega o Suesuega faapitoa mo le faalapotopotoga.
O Fiso o loo ia umiaina le faailoga o le Matua o Faiva ma le Tofa Saili faapea ai le faailoga Foma’i mai le Iunivesite o Faatoaga ma Vailaau i Hokkaido i Iapani.
O loo ia umia foi le Faailoga Tikeri i tulaga tau Saienisi mai le Iunivesite o le Vasa Pasefika i Saute.
O agavaa ma tomai o lea faleupolu o le atunuu o le a faaauau ai le tulituliloa o le vaai mamao a le SROS ia taulamua i le tapenaina o suesuega faasaienisi i tomai faapitoa mo le manuia o le atunuu.
Ua faaipoipo le Tofa Fiso ma o se matai tausi aiga mai le afioaga o Vaitoomuli i Palauli.
