Ua toe taofia nei e leoleo Soo’au Vaa ma lona faletua ia Maylynn Brown i le mae’a ai ona tulai i le Faamasinoga Faaitumalo ananafi.
O le mataupu faasaga ia i laua sa tolopo mai e tulai ai le faamasinoga seia saili sa la loia ma faamautu moliaga a leoleo, e oo mai ananafi e lei mautu lava moliaga a leoleo ma e lei maua foi se loia a i laua ua molia.
Ae o le agai mai ai i fafo o le potu faamasino na logoina ai loa e leoleo lea ulugalii ina ia latou o atu i le ofisa e toe faia nisi o moliaga e faatatau i lo la solia o aiaiga o le tatala ai o i laua i tua.
Na faailoa o se faasalalauga na toe faia e i laua i luga o le facebook lea ua solia ai aiaiga o le talala ai i tua e pei ona tuuina atu i le taimi na tulai ai muamua.
O le aso 20 o le masina nei lea ua faatulaga e le faamasinoga e toe tulai ai Vaa ma Maylynn.
