I le uluai pine auro ma le pine siliva a Samoa na maua i le tuanai o aso e lima talu ona faagasolo taaloga a Malo o le Taupulega, o le aso ananafi na faailoa mai ai le toe faaopoopo o isi pine siliva e lua mo Samoa i le taaloga lava o le siisii u’amea mamafa lea na manumalo ai le tamaitai o Feagaiga Stowers ma Jack Hitila Opeloge.
Ua 3 ai nei pine siliva ma le pine auro e tasi i le aofaiga e 4 o pine ua maua e Samoa mai le taaloga siisii uamea mamafa. E auina atu le lipoti lenei mai le taunuuga o taaloga o le aso lona lima, e le’i taunuu mai faai’uga o taaloga o le aso lona ono, le aso lea ananafi poo le po anapo auā o loo ao ai Peretania ae pogisa Samoa.
O le tatou aulakapi ta’ito’afitu e le’i manuia i le sailiga o pine, ae ua faamanuiaina lo latou taumafai i le tulaga lima o taaloga lakapi ta’ito’afitu a Malo o le Taupulega o lenei tausaga 2022.
Faailoa mai e le pulega o le tatou ‘au o se tasi o vaaiga mata’ina o le avanoa sa tuuina atu i le Peresetene o le faalapotopotoga o taaloga a Samoa na te tauaao ai pine mo le taaloga siisii uamea mamafa, lea na manumalo ai mo le taimi muamua i le pine siliva i taaloga a Malo o le Taupulega le alii o Vaipapa Nevo Ioane.
