Ua sainia e le Palemia o Samoa, Fiame Naomi Mata’afa ma le minisita o le va i fafo a Niu Sila, Winston Peters le faafouga o le Statement of Partnership i Apia i le Aso Faraile talu ai.

O le po o le Aso Tofi na tulaueleele ai i Samoa le faigamalaga a Peters ma le minisita o le Soifua Maloloina a Niu Sila, Dr Shane Reti pei ona lipotia atu i le amataga o le vaiaso i le malaga, le Pacific Mission lea e faaiu i Samoa. 

O le faiga faapaaga ua sainia ua faatulaga ai vaega e ave iai le faamuamua i le galulue faatasi ai o Niu Sila ma Samoa aemaise i mataupu e pei o suiga o le tau, atinae o tagata soifua ma le tamaoaiga ma le faamalosia o le puipuiga i le itulagi.

O lea foi faiga faapaaga ua sana faamautu ai ma le naunautaiga e lagolago ai e Niu Sila Samoa i le taligamalo i le fonotaga a faauluuluga o atunuu o Malo o le taupulega e faia i Samoa i se taimi mulimuli ane o lenei tausaga.

O isi atunuu na afea i le malaga lea a Peters ma Reti e aofia ai Tonga ma le Atu Kuki.