E faitau selau avetaavale i Kuiniselani e maua faamaoniga o le fualaau faasāina o le cocaine i o latou systems ma ua faamaonia lea faamatalaga ina ua tuufaatasia faamatalaga sa aoina mai suesuega na faia. 

Fua i faamaumauga mai leoleo i Kuiniselani, ua iloa ai e 332 soligatulafono o le avetaavale a o faaaogāina le cocaine faamauina i le va o le aso 7 o Iulai agai i le aso 31 o Tesema 2023.

I lalo o le tulafono i Kuiniselani o soo se tagata e faamaonia le faaaogāina o le cocaine ma isi fualaau faasāina e mafai ona faasala tupe e oo atu i le $2167.

I se pepa la o faamatalaga ua faailoa ai e leoleo i le vaiaso nei o le a ono faia ni poloka mo le suesueina o fualaau faasāina ia e aofia ai ma le faia pea o siaki pe a mae’a se faalavelave tau taavale e tulai mai.