E toalima tagata ua maliliu ma le toatolu o loo tau sailia atoa ai ma le silia ma le 120 afe o fale i Kuiniselani ua motusia mai ai le eletise ona o aafiaga o uiga loulouā o le tau ua aafia ai.
O le aso Kerisimasi ma ananafi le Boxng Day lea na aafia ai Kuiniselani ae faapea foi ma vaega o Niu Sa Uelese ma Vitoria.
I Kuiniselani lava ia ua lipotia e 9 tausaga o se teineititi e talitonuina ua malemo ina ua fiu e tau sailia mai Rochedale South i le aso ananafi.
E oo mai i le asō o loo faia pea sailiga ae na maua foi i le isi faaitu o Gympie le tinomaliu o se tamaitai e 40 tausaga le matua na tafea ane i le taimi o tafega.
O loo sailia pea foi e leoleo le isi tina e 46 tausaga le matua fai mai na tafea ane foi e lata i Kidd Bridge i le aoauli ananafi.
O le vaa na sa’e i Moreton Bay e lata i Brisbane lea e faapea na maliu ai foi se isi tagata i le aso ananafi.
E toalua o loo sailia pea.
O laau na toulu na maliu ai se tina mai le Gold Coast i le aso o le Kerisimasi ma se alii na maliu mai foi i Victoria i le aso ananafi.
I NSW e silia ma le 1,217 valaau mo fesoasoani na oo atu i le ofisa o le SES ona o lologa aemaise mea faaleagaina mai savili malolosi, faititili ma uila.
Na vaaia foi le toulu o le aisa i isi pitonuu.
