E toafitu suafa Pasifika logologoā muamua i le lakapi o le a faamauina suafa i le uluai nofoaga a le Pasifika o tagata lauiloa i le lakapi, Pasifika Rugby Hall of Fame (PRHOF) i Aukilani i le aso 28 o le masina nei o Mati.

O lea faamoemoe o le a faaaloalogia ai sui lauiloa o le All Blacks ma le Manu Samoa ua maliliu, Jonah Lomu ma Papaliitele Peter Fatialofa.

I le lisi o i latou o le a faamauina suafa i lea nofoaga, e aofia ai le sui ta’uta’ua o le lakapi taitoafitu a Fiti o Waisale Serevi, le faamatua muamua o le All Blacks, Tuifaasisina Sir Brian Williams, le uigi muamua a le Manu Samoa ma le faiaoga o le aulakapi taitoafitu a Samoa o Muliaagatele Bryan Lima, le kapeteni logologoa muamua a le au a tamaitai a le Black Ferns a Niu Sila o Seiuli Fiaoo Faamausili ma le sui muamua a le Wallabies o George Smith.

O lea sauniga o le a faia i le nofoaga tele a le Grand Hall i le malae i Eden Park i Aukilani, o se vaega o le vaiaso o le Pasifika Excellence Week e pei ona faamaopoopoina e le komiti a le Pasifika Rugby Hall of Famer.

O lea vaiaso o le a faaiuina ai i le taaloga tele i le va o le Moana Pasifika ma le Blues, le Taua o le Pasifika (Pacific Battle) i le taamilosaga o le Supa Lakapi i le aso 30 o Mati i le malae i Eden Park.

O le masina o Novema o le tausaga talu ai sa faalauiloa aloaia ai lea nofoaga a le Pasifika Hall of Fame.