Tuilaepa Lupesoliai Sailele Malielegaoi & Lealailepule Rimoni Aiafi

Tetee Tuilaepa ma Lealailepule i faitioga a le Sui Palemia

A’o tālia ai nei se faai’uga a le komiti filifilia o tulaga aloaia ma amio taualoa a le Palemene i le faitioga a le sui Palemia o le faipule o Gagaemauga Numera tasi le afioga Tuala Tevaga Iosefo Ponifasio, ua lipotia ai nei le teena o lea faitioga e sui a faipule o loo faasaga iai le faitioga, le taitai o le Itu agai le faipule o le itumalo faapalota o Lepa, susuga Tuilaepa L Sailele Malielegaoi, ma le faipule o le itumalo faapalota o Faleata 3 le tofa Lealailepule Rimoni Aiafi.

Ua lipotia e le nusipepa o le Samoa Observer ua latou maua se kopi o le tali a sui faipule, le finauina e Tuilaepa ma Lealailepule o le faalēaogāina atoa o le faitioga, i le la mau e leai se vaega o tulaga mamalu ma aloaia o le Palemene ua o la solia, ma la te lē o solia ai foi le moliaga o le faalemigao i le Palemene le contempt of Parliament.

Ua finauina foi e ia sui faipule o le Itu agai i le la tali tusitusia ua i luma o le komiti o tulaga aloaia ma amio taualoa, o tuua’iga i le faitioga ua mae’a ona tagofia e le Faamasinoga Sili a le atunuu e pei ona iai lana faaiuga na folasia i le masina o Mati lea ua faamaonia ai lo la moliaga o le faalemigao i le Faamasinoga ae ua leai se faasalaga e mafua ona o le maliega na sainia ia Fepuari i le va o taitai o vaega faaupufai le Faatuatua i le Atua Samoa ua Tasi ma le Vaega e puipuia aiātatau a tagata e ave i tua tagi sa faaulu i le faamasinoga.

O le Aso Lua o le vaiaso asau e toe tauaofia ai le Palemene a le atunuu lea o le a lipoti atu ai le Komiti suesue o tulaga aloaia ma amio taualoa e faatatau i lenei mataupu. 

Scroll to Top

Keep uptodate with Radio Samoa activity & promotion

* indicates required