E toatele leoleo na tali atu anapo i le faaoolima matuia na tulai mai i totonu o le faleaiga a le McDonald’s i Stoddard Road i Mt Roskill i Aukilani.
E toatasi lē na faamanu’alia tigaina ai ma o lea na auina atu i le falemai, ae ave e leoleo le isi tagata e toatasi.
Ua lipotia o lē ua faamanu’alia ma lē ua taofia nei i lalo o vaavaaiga a leoleo e iloa lelei e le tasi le isi.
I ata na maua mai e le Herald o loo maua ai le tele o le toto masaa i totonu o le faleaiga, ma e tusa o le tea o le valu anapo lea na tupu ai.
O le a faaauau pea ona vaaia leoleo i lea vaega o Mt Roskill, ma ua faamautinoa mai ai foi e le ofisa e lē o iai se tulaga lamatia i le soifua o tagata lautele ona o le mea na tupu anapo ma o loo iai lo latou talitonuga o le va lava ia o tagata e toalua na aafia.
