O loo teena e le toasefulutasi o sui o le afioaga o Leauvaa o latou moliaga o le solia o le poloaiga a le faamasinoga.
O le Aso Lua na tulai ai i latou i le faamasinoga faaitumalo.
Mai le 11 o i latou e toatasi ua maliu, ma sa talosaga le itu a leoleo ina ia faaui mai tua le moliaga o lē ua maliu ma le tusi saisai mo le toatasi e lei tulai i lea aso.
O moliaga o i latou e mafua mai lea i le lē usitaia o le poloaiga a le Faamasinoga ina ia tulai ese mai fanua o loo ua mae’a iai le faaiuga a le Faamasinoga o Fanua ma Suafa.
O le faaiuga a le Faamasinoga o faatulaga mai ai le pule o ia fanua i le Pule a alii ma faipule o Afega i lalo o le faamalumaluga a Fata ma Maulolo.
O i latou ua molia o ni tamalii ma tulafale o le afioaga o Leauvaa ma e amata atu i le 60 agai i luga le matutua o le soifua.
Ua faatulaga le aso 24 o Aperila o le tausaga nei e suesueina ai lea mataupu.
