O loo teena e le minisita o le Koviti faamatalaga o loo galulue faasoloatoa fomai tausi soifua o loo galulue I nofoaga o faanofoesea ai tagata mai fafo
O le tali mai lea a Chris Hipkins ma lana saunoaga i se feiloaiga ma tusitala e leai ni faamaoniga o loo galulue faasoloatoa fomai I totonu o sifi faigaluega tai 24 itula ona o le utiuti o le aufaigaluega e galulue I le sifi po
Peitai I ripoti a le leitio a Niu Sila o loo sau ai taimi faigaluega faatulagaina o se tasi o fomai tausi soifua, e tatau ona galue mo le 21.5 itula, ao le isi na faigaluega tolu sifi tai 24 itula
O nei itula o nisi ua molimau e tusa ma tala a le newshub e galulue e le malolo mo le 19 itula, ao le isi 5 itula e malolo ai ma ua iai sifi uumi ua aafia ai ma galuega o le isi aso e sosoo ona ua leai se isi e tauavea lea sifi
O le faasalalau o nei itula faigaluega, ua saunoa ai ma le tamaitai palemia, Jacinda Ardern o le a vaavaai iai I atugaluga ua faailoa mai ma ia mautinoa o loo saogalemu fomai ma a latou galuega Ae mai le matagaluega o le soifua maloloina, o loo faaauau pea ona faaleleia auaunaga I nofoaga o loo faanofoesea ai tagata mai fafo, ma e iai lava foi taimi e aliae mai ai faafitauli ona o le tele o mafuaaga e aafia ai le aufaigaluega, peitai I lona aotelega o loo sologa lelei mea uma
