E 6 afe le uta o vailaau o le tuipuipui o se foa’i a Niu Sila ua taunuu mai mo le matagaluega o le soifua mālōlōina, ma ua talafeagai le foa’i ma le pipisi o le faama’i o le tale vivini.

O ia vailaau o le a faaaogā mo le puipuia o tagata matutua mai lea faama’i, auā o le taimi ina ua amata le pipisi o le tale vivini sa na o fanauiti sa maua le tuipuipui.

E taugata le tau o le vailaau mo tuipuipui o tagata matutua ae o lea ua maua i le agalelei o le malo o Niu Sila.

Faaalia i se pepa o faamatalaga e lē gata ina faaaogā mo le aumatutua lea vailaau o le tuipuipui ae faapea foi i tina ma’ito.

O le a ave le faamuamua i tuipuipui mai lea uta o vailaau mo i latou o galulue i le auaunaga a le soifua mālōlōina o loo ta’imua i galuega o le puipuiga o le atunuu, faapea ma tinā ma’ito.

Ua faaalia o se fesoasoani lenei o le a lē fesiligia le tāua tele i le tau togafitia o le pipisi o le faama’i o le tale vivini lea o loo mātele ina maua ai fanauiti.