E foliga mai o lea ua tauva tagata Kiwi toe fia foi mai I le atunuu ma tagata taaalo mai fafo o loo fia omai foi

Ripotia e le leitio a Niu Sila le toatele o tagata taaalo ma le au tauva mai fafo o lea ua maea talia talosaga e omai ai, ao lea lava foi e le I uma le lisi

O le faaiuga o le masina nei o loo fuafua ai Winter Games I le South Island ma e 60 le au tauva, tagata faasalalau faapea le aufaigaluega o loo faatali o latou avanoa

O lea ua maea saini le minisita mo le faitau selau o tagata galulue faavaomalo e ui mai iinei faanofoesea ao lei agai atu ai I Antarctica

I se pepa o faamatalaga mai le vaega o femalagaiga a Niu Sila o lea ua o latou taliaina le 356 talosaga mai tagata faigaluega I lalo o le polokalame a le Antarctic, ma o loo iloilo le isi 201 talosaga na taunuu mai I le vaiaso talu ai

I faamaumauga mai le vaega faanofoesea o avanoa o loo fuafua e ave I kulupu nei e malaga mai,

• Antarctic – 800 avanoa mai le masina lenei seia oo ia Novema
• Tagata toe foi mai le expo I Dubai – 401 avanoa mai ia Oketopa seia oo ia Mati o le tausaga fou
• Ma le Crankworx – 70 avanoa I le masina o Oketopa

O nei faigamalaga uma e le o aofia ai fuafuaga a le malo lea ua tuu ese ai isi 500 avanoa I totonu o le lua vaiaso mo ana poloketi

E oo mai I le taimi nei o lea ua tutumu uma potu I nofoaga faanofoesea seia oo lava I le faaiuga o Novema, ma o lea foi e le I toe sau se tala poo afea e mafai ai e tagata Niu Sila toe fia foi mai ona taofi avanoa mai ia Teseama faasolo atu I le tausaga fou