O le afioga i le sui o le Fono a Sui Tofia le afioga Le Mamea Tuiletufuga Ropati Mualia, na fai ma sui o le afioga i le Ao o le Malo na te talia tusi tofiga o le sui o le Malo o Farani mo Samoa, le tamaitai Amepasa fou o lea Malo mo le tatou atunuu o Laurence Beau.
Ua 49 tausaga o le mafutaga faaleuo ma o le umi foi lea o osiosi sootaga faavaomalo o Samoa ma le Malo o Farani, o se tasi o atunuu o le Atu Europa o loo iai nisi o motu o le Vasa Pasefika o loo avea ma ona teritori.
Ua faailoa e le tamaitai amepasa filifilia fou i le sauniga na tauaao ai ona tusi tofiga, ua mausali pea ma mauaa sootaga o Farani ma le Pasefika e pei ona faailoa e le Peresetene o lea Malo o Emannuel Macron ia Iulai o le tausaga nei, o le a faatuina se ofisa o lona Malo i Samoa.
Na faailoa foi e le afioga i le Sui o le Fono a Sui Tofia le taliaina e Samoa o lea fuafuaga o le a saga faamauina ai pea le vavalalata o le mafutaga ma sootaga o Malo e lua.
O loo galulue faatasi Samoa ma Farani i totonu o le Iuni a Europa ma le faalapotopotoga o atunuu Aferika, Kerepeane ma le Pasefika lea e iai foi ma le Iuni a Europa.
Ua 30 tausaga o galue le tamaitai amepasa fou o Farani i tofiga na avea ai o ia ma sui o lona Malo i isi atunuu o le lalolagi.
