O le toe faaleleia o le atinae o tagata tafafao mai fafo i le tuanai o le 3 tausaga e mafua i tapu ma vavao o le faama’i koviti, aemaise o le savalia ai nei o le 2 tausaga talu ona toe tatala tuaoi o Samoa sa tapunia ona o puipuiga mai lea faama’i, ua molimauina ai e tusa o faamaumauga mai le pulega o tagata tafafao le faaopoopo pea o nisi atinae tau tulisi i le atunuu ua tatala mo tagata tafafao mai fafo.
I le afioaga o Asaga i Savaii ua fetaui le tumutumu mai o tagata tafafao mai fafo mo faiga malologa o le faaiuga o le tausaga, ma le tatala o fale nofo mo tulisi i lea afioaga ua faaigoaina o le Blue Lagoon Villas.
O ni fale e mafai ona faamautu ai ni malaga toatele aemaise lava o aiga e malaga mai i Samoa i ni faatasiga poo reunion.
O le tasi lea o nofoaga mo tagata tafafao ua faaopoopo i se isi nofoaga na tatala i le tausaga na tea nei, le nofoaga i le auala agai i le Mafa ua mafai ona afea mo ni malologa, fai ai se ipuvai malu poo se kofe vevela ma maimoa i le lanulauava o atumauga i lea faaitu i le agai i le atu Aleipata.
