Search
Photo Credit: M.W.C.S.D.

Tatala aloaia le 16 aso o faatinoga e tetee atu ai i sauaga i tina ma tamaitai

O le 16 aso o faatinoga o se faamoemoe sa fauina mai e tagata taitoatasi faapea vaega tuma’oti ma o loo mafai ona faatinoina ai taumafaiga e foia ai le faafitauli i sauaga faasaga i tina ma tamaitai aemaise ai o fanau.

O se faamoemoe e faatinoina lea i tausaga taitasi ma o loo taimua ai le Matagaluega o Tina ma Tamaitai Atinae o Afioaga ma Aga Fesootai faapea ai ana paaga lagolago.

Na saunoa ai le Minisita o le Matagaluega, Afioga Mulipola Anarosa Ale Molioo e tusa ai ma le tatalaina o lenei polokalame.

“O loo tulai malosi le Malo e faatino lenei pitolaau tāua o le unaia lea o auala e faalauiloa ai pea sauaga o loo tutupu mai ma unai pea faalauiloa ma faatinoga ina ia a’oa’o ai o tatou tagata i auala e mafai ai ona taofia lenei amio matagā ma tafiesea ai uiga mai lo tatou atunuu.

“O le autu ua faaigoaina ia tutu faatasi ina ia taofia sauaga i tina ma tamaitai aemaise o fanauiti ma e lē toe iai se isi lava mafuaaga o le a faaauau ai pea lea tulaga matagā.

“O le Pasefika o se tasi lea o itulagi o loo maualuga le tulaga o loo iai sauaga o tina ma tamaitai.”

O le suesuega sa faatino i le 2018 o loo manino le tele o le faafitauli o loo feagai nei ma Samoa i le sauaina o tina ma tamaitai i le itu o tamaiti e tusa ma le 87 pasene e aafia i sauaga i totonu o aiga.

E 9.5 pasene o tamaitai e lipoti mai sa faamalosi e le tagata lava o lona aiga, mo tagata matutua e 86 pasene o tina ma tamaitai nofotane sa aafia i sauaga e pei o le kiki, tu’i ma le faaaogāina o mea malo e faaoo ai sauaga.

“Ou te faapea atu ma lo’u ava tele o nei pasene e faailoa mai ai o se tulaga pagatia ua iai nei Samoa ma e tatau ona ave atoa le faamuamua ina ia tafiesea le mala.

“O nei pasene o loo faailoa mai ai le aoina mai o faamaumauga o le taiala lea mo tatou uma e faailoa ai poo fea o iai a tatou taumafaiga.”

E pei ona ta’ua e Mulipola o le tau aofai o sauaga o loo fuafuaina e tusa ma le $98 miliona tala i le $132 miliona tala pe tusa ma le 6-7pasene o le tamaoaiga o Samoa.

“A lē mafai ona foia nei faafitauli o le a faaauau pea ona siitia le tau o sauaga ma o se tupe alu ma’umau.

“O se faafitauli ogaoga ma e tatau ai pea ona tatou faatāua le aoina mai o faamaumauga o loo faatino pea pe o faatupulaia ai le alu agai i luga o fuainumera i le sauaina o tina ma tamaitai ma tamaiti.

“O le a galulue le ofisa o fuainumera faamauina ina ia faaauau pea le ave o le faamuamua i lea tulaga.”

O nisi o vaega o le a faatino i le 16 aso e aofia ai aoaoga, faalauiloa, tusiaina o tala, o le unaia o le faatāua ma le faalauiloa o tina ma tamaitai o loo sauaina e agai lava i le tetee atu i sauaga.

O se fagufagu ma se faamanatu a le Minisita, o Samoa o loo aoaoina mai i le faa-Kerisiano ma tu ma aga a le atunuu ma e ao lava ona fofo ai faafitauli faapenei ma e iai le talitonuga e mausali le amataga o lenei faamoemoe pe a galulue faatasi.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required