O le toe fetuunai ai e le Palemia o nisi o minisita o le Kapeneta talu ai nei ma faaopoopo ai minisita e toalua ua 15 ai minisita o le Kapeneta ua aofia ai le taitai o le Malo, ua tuu uma ai le vaaia o eleele o le Malo i le matagaluega e tasi, le matagaluega lea o Puna’oa Faalenatura ma Siosiomaga.
O le vaaia o le faalapotopotoga o eleele le Samoa Land Corporation, ma fanua o le Esetete Tausi lea sa ese foi le minisita sa vaaia ua i lalo uma o lea matagaluega.
Faaalia e le Minisita sa iai e vaaia o le faalapotopotoga o eleele a Samoa i le polokalame o le Soalepule, o le silasila a le Palemia e ao ona tasi le matagaluega e iai le vaaia o fanua o le Malo, nai lo le tulaga sa iai e tolu minisita o le Kapeneta sa iai le vaaia o ia aseta tāua.
O le polokalame o galuega faavaitaimi lea sa i le Matagaluega o Alamanuia, Pisinisi ma Leipa ua faasee atu nei i le vaaiga a le Minisita o le Matagaluega o Tupe a le Malo.
O le amataga lava o le polokalame sa i lalo o le vaaiga a le matagaluega a le Palemia ma le Kapeneta lea polokalame, ae na faasee atu i le vaaiga a le matagaluega o Alamanuia Pisinisi ma Leipa i ni tausaga, seia oo ina faia le suiga fou ua iai nei.
