E tāua le faailoa ai e le Komesina o leoleo ia Auapaau Logoitino Filipo, o tapenaga mo le puipuiga i le taimi o le fono a ta’ita’i o malo o le taupulega i le masina fou o Oketopa, e pei o le tapunia o nisi o auala e aga’i i le taulaga mo le lautele o le atunuu, se’i vaganā i latou e iai le faatanaga e sopoia ai ia magaala.

O le feiloa’iga a le vasega o tusitala i Samoa ma ta’ita’ifono o nisi o komiti o loo feagai ma ia tapenaga, na faailoa ai e le Komesina, o le magafā i Matautu uta i Apia, o le auala i le va o le maota o le Ioane Viliamu ma le malumalu EFKS i Apia, le auala i le va o le ofisa autū o leoleo i Apia ma le nofoaga sa iai le maota faamasino tuai, auala i le va o le falemeli ma le faletupe o le ANZ, le auala o loo tau atu i le uati tele, ma le auala i le va o le kamupani o le ASCO ma le fale tele o le MacDonalds building, o le a loka mo le lautele o le atunuu mai le Aso Lulu 23 o Oketopa e oo i le Aso Faraile 25 o lea lava masina.

Ua mafua lea fuafuaga ona o le aualatele mai le faletalimalo o le Taumeasina aga’i atu i Mulinuu o le a avea ma nofoaga atoa e faagaioia ai fonotaga e muamua faagasolo, faapea le Fono a Malo o le Taupulega o le a faia i le Maota Fono o le Palemene i Mulinuu.

Le tofa Auapaau Logoitino Filipo o le Komesina o leoleo, falepuipui ma le toe fuata’ina. 

O loo iai le fuafuaga e faia ni faasalalauga faalaua’itele mo le silafia e le atunuu o taimi e tapunia ma tatala ai ia auala tetele i le taulaga.