Search
Search

Tapenaga o finagalo tusitusia ma finagalo tuufofoga

O le taeao nei ua amata faaulu ai finagalo tusitusia (written submissions) o Samoa potopoto o loo faamaopoopoina e le Pacific Leadership Forum ma le Fono Faufautua a Samoa i Aukilani, faapea le lagolago a le Mafutaga Soofaatasi a Faifeau Samoa i Aukilani.

Saunoa le fetalaiga Teleiai Edwin Puni, o ia o le ta’ita’ifono o le Pacific Leadership Forum, o le vaiaso fou o le a faaulu ai talosaga mo finagalo tuufofoga (oral submissions).

O le manuia o le pili taufaaofi a le faipule ia Teanau Tuiono e moomia ai le lagolago a vaega faaupufai uma o loo i le Palemene o Niu Sila.

E lē gata i le Green Party o loo tauaveina le pili, faatasi ma le Labour Party ma le Te Pati Maori, ae moomia ia faaauau le lagolago a le New Zealand First Party ma le ACT Party, ae e lē tuua ai foi le savalia pea o le National Party.

O le toe finau atu e faafoi mai le sitiseni Niu Sila o tagata Samoa e pei ona iai le faaiuga a le faamasinoga maualuga i Peretania o le Privy Council, lea sa faamuta e le Malo o Niu Sila i le tulafono o le 1982, o se mataupu e ma’ale’ale ma e lagalagā ai foi finagalo o tagatanuu o Niu Sila.

O le mafuaaga lea o le ta’ialalo o la tatou tapenaga; e tāua le tapena ma le poto; ia aua foi le naunau i le i’a, a ia manumanu i le upega.

O le lagolago o loo moomia e Tuiono i le taimi lenei o le tele lea o ni finagalo (submissions) e tuuina atu i le soākomiti (select committee) a le Palemene lea o le a o latou iloiloina lenei pili taufaaofi a o lei toe tuuina atu i luma o le Palemene a Niu Sila i lona tolaulauga lona lua.

·         E faagata le faauluina o finagalo (submissions) i le Aso Faraile 31 Me 2024; o lona uiga e toe 11 aso o loo totoe.

·         E lua auala e faaali ai finagalo…. o finagalo tusitusia (written submissions) poo finagalo tuufofoga (oral submissions).

·         O la tatou tapenaga o le a faaulu uma submission online e faaaogā ai le website a le Palemene. O se auala e vave ma faigofie ma mautinoa e taunuu uma submissions a o lei tapunia le avanoa.

·         E tatala le avanoa i soo se Samoa e lē gata i NZ, Samoa ae faapea foi isi tafa o le lagolagi e faaulu ai sau submission. O le tele o finagalo faaalia o le malosi foi lea o la tatou itu ona o loo iai foi finagalo o isi tagata Niu Sila aemaise ofisa o le Malo o Niu Sila e faaalia ai lo latou tetee i lenei pili tau faaofi.

·         E iai nisi o mafutaga ma ekalesia o loo ave faatasi sa latou submission e ala lea i le tuufaatasia o se sainigalima. Peitai o le itu o loo tatou faatāuaina, o le tele lea o submission. E tāua ai le fai lava o le submission a tagata taitoatasi. 

O le a toe tuuina atu i se taimi lata mai le link mo le faauluina o written submissions i le vaiaso nei.

O le a faamalamalama atu ai le faauluina o written submissions pupuu e lagolago i le pili taufaaofi a Tuiono.

O le vaiaso fou o le a faaulu ai a tatou talosaga mo i latou e fia faia ni finagalo tuufofoga (oral submission), ae faatoa iloiloina i se taimi o Iuni, Iulai poo Aokuso.

O lona uiga e lē moomia se tala tusia i le taimi nei; pau le tulaga tāua ia faaulu le talosaga a o lei tapunia avanoa i le Aso Faraile 31 Me 2024.

O loo iai le avanoa e talosagaina ai le soākomiti e fofoga ai lou finagalo tuufofoga i Aukilani, poo Christchurch foi pe a faigata ona malaga i Ueligitone.

Saunoa Teleiai o le a taumafai lava e faaavanoa lona taimi e faamalamalama ai nisi o fesili e ono fia fesiligia atili ai lenei mataupu.

Tala sili ona faitaulia

TALA FOU MAI SAMOA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required