Ua faailoa e le afioga i le Minisita o Tagata Tafafao Maimoa Mai Fafo Toeolesulusulu Cedric Schuster nisi o fuafuaga mo le faamanatuina o le 60 tausaga talu ona tutoatasi Samoa mai pulega faakolone. 

I se faatalatalanoaga a le Minisita ma le sui o le Radio Samoa i le taeao nei na ia ta’ua ai, mo le tutoatasi atonu o le a sisi ai le tagāvai o Samoa ma faatino se polokalame puupuu ae mo se taimi mulimuli ane i lenei lava tausaga, o le a faatelē ai loa le faamanatuina o lea aso tāua a le atunuu pe a tatala tuaoi. 

“O le tulaga lea ua iai le fuafuaga pe na’o le sisiina o le fu’a ma se polokalame laititi e faatino a’o le tele o fuafuaga lea ua tuu atu e tapena o le a fai i tua atu, afai e iai le taimi e mafai ona tatala atoatoa ai tatou borders e lē gata mo i latou e malaga mai fafo ae o tapenaga foi a o tatou tagata i totonu o le atunuu e le gata o au faili, au faipese, o fautasi, e manaomia le taimi e kolegi ai ma tapena ai fuafuaga uma nei, o le ala lea ona o le tatou vavao sa iai, e talitonu le malo e lē o lava se taimi e tapena lelei ai le atunuu, o le isi vaega lea o loo vaavaai ai i se taimi e galulue ai le komiti ia lava se tapenaga a le tatou atunuu mo lenei aso ona e faatāua tele lea faamoemoe a le atunuu”. 

E pei ona silafia o le po anapo lea na faasilasila ai e le Tamaitai Palemia le tatala ai o tuaoi o Samoa mo malaga masani i le masina o Aokuso ma Setema o le tausaga nei.