Sa faailoga le 100 tausaga o le Kolisi o Avele, lea ua faato’ā mae’a le selau tausaga o le asosi o tama ma teine tuai o le Malisi, ae o le masina nei o le a faailoga ai le 100 tausaga o le taaloga o le lakapi i Samoa.
O nisi o kalapu lakapi matutua o latou na amata faavaeina mai kalapu lakapi i le tele o tausaga ua tapenapena foi e auai i lea aso faailogaina e pei o le kalapu lakapi a le afioaga o Vaiala.
Ua faailoa i se pepa o faamatalaga le auai o lea kalapu i le solo poo le savali o le a faia i le taulaga i le aso 27 o le masina nei o Aokuso i le faailogaina o le selau tausaga o le taaloga lakapi i lo tatou atunuu.
O le itu mautinoa e auai foi ma nisi o kalapu e pei o le kalapu lakapi a le afioaga o Moataa ma Apia auā o nisi ia o kalapu sa latou amataina le atina’e o le lakapi i tausaga ua tau amata le taaloga i Samoa.
O se tasi o tapenaga a le kalapu lakapi a Vaiala o se taumafataga o le afiafi e faatau ai laulau poo se corporate dinner, faatasi ai ma se taamilosaga lakapi e faia tonu i le vaiaso o le Teuila ia Setema.
Ua avea foi le faailogaina o le 100 tausaga o le lakapi i Samoa o le a manatua ai e le kalapu lakapi a Vaiala nisi o toa magumagu ua fai i lagi le folauga ae o i latou sa amatamea i le faatuina o le kalapu lakapi a le afioaga.
