Tapena le Au Taitoafitu mo taaloga i Monaco

O le aso 19 ma le aso 20 o Iuni 2021 lea ua faamautu mai o le a faia ai le taamilosaga i Monaco e saili ai avanoa a nisi o au lakapi taitoafitu mo le Olimipeka e aofia ai ma le au a Samoa.

E lua pulu (pools) ua faailoa mai e le Lakapi taitoafitu o le lalolagi o le a faia i lea taamilosaga ma o Samoa e pulu faatasi ma Ireland, Tonga ma Zimbabwe i le Pulu A, ae o le Pulu B o le a fetaui ai Hong Kong, Chile, Uganda, Jamaica ma Farani.

Taua e le Faiaoga Ulu a le Au taitoafitu a le atunuu Muliagatele Brian Lima i le Radio Samoa o loo faaauau pea tapenaga a tama taaalo aua le sauni atu i lea taamilosaga ma o le faamoemoe ina ia saofagā le au a Samoa i le Olimipeka lea o le a faia i le Aso 23 o Iulai i Tokyo.

Taua foi e Muliagatele ua tuu e iai se taaloga a le au a Samoa ma le au tele a Niu Sila i le tolu vaiaso talu ai peitai e lei mafai ona malaga mai le au mai Samoa ona o puipuiga lava o le faamai o le Koviti 19, lea la na filifili ai lava nisi o tama taalo o loo i Niu Sila nei e faataunuu lea taaloga. O se auala foi e fesoasoani ai i tapenaga a tama taaalo i le taamilosaga o loo loma nei

O le uluai taimi lenei o le a taaalo ai le au taitoafitu a Samoa i nei taamilosaga i lalo o le Pulega a le Faiaoga fou ia Muliagatele ma o le naunautaiga i le Alii Faiaoga ia maua se avanoa a Samoa mo le Olimipeka o lenei tausaga.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required