Ua iai nei se galuega o loo lagolago iai le Faalapotopotoga o le Siosiomaga o le Pasefika lea e ta’u faapuupuu o le S.P.R.E.P e lafoa’i le tusa ma le 60,000 lita o suāu’u o loo i Samoa ua lē toe manaomia ona fa’aaoga.
O le Matagaluega o Punaoa, Faalenatura ma le Siosiomaga faatasi ai ma faalapotopotoga tumaoti o loo latou faia le galuega o le vaaia lelei o otaota lafoa’i faapea le SPREP o loo feagai ma tapenaga o le va’aia lelei o tulaga saogalemū o le siosiomaga a o le’i lafoa’iina ia suāu’u.
Ua fa’ailoa i se pepa fa’alauiloa mai le Faalapotopotoga o le Siosiomaga o le Pasefika o lona ofisa tutotonu o loo i Samoa, o le tāua o le tapenaga o loo faia, ina ia mautinoa e leai ni aafiaga i le lumanai i le lau’ele’ele ma le ola faalenatura pe faatino lea fuafuaga.
O se kamupani i le atunuu o Siamani e ta’ua o le Black Forest Solution ua manumalo lana ofo i le lafoa’iina o ia suāu’u.
Ua lē faia ai le fuafuaga sa iai muamua e ave le 60,000 suāu’u ua lē toe manaomia e lafoa’i i Fiti, Initia, Ausetalia poo Niu Sila.
O le nofoaga i Tafaigata o loo aga’i iai tapenaga o loo faia nei ina ia mautinoa ua puipuia ma saogalemū, e leai ni aafiaga e tulai mai pe a faatino le lafoa’i iai o ia suāu’u lē aogā.
